धर्मकोशाचा थोडा तपशील पुढीलप्रमाणे:
‘धर्मकोश प्रकल्प’ हा ११ कांडांचा आणि ४६ खंडांचा असा आहे. गेली सुमारे शतकभर हे काम अव्याहतपणे चालू असून आतापर्यंत केवळ २७ खंडांचे काम पूर्ण झाले आहे. प्रत्येक कांडातील खंडांची संख्या एकसारखी नाही. व्यवहारकांड, उपनिषदकांड, संस्कारकांड, राजनीतीकांड, शांतीकांड हे आणि या प्रकारचे असे एकूण ११ विभाग आहेत. हे काम अत्यंत बृहत आणि दीर्घकाळ चालणारे असेच आहे. या प्रकारचे काम समजून घेणे आणि ते पुढे विकसित करीत जाणे याचे आकलन असणाऱ्या आणि त्याप्रमाणे काम करणाऱ्या व्यक्तींची संख्या ही नेहमीच कमी असते. त्यातही अलीकडील काळात आपल्या नव्या शिक्षण पद्धतीमुळे अथवा अन्य कारणाने या प्रकारचा अभ्यास करणाऱ्या व्यक्ती दुमळ होत चालल्या आहेत. आपल्या देशातील प्राच्यविद्याविशारद प्राध्यापक रा. ना. दांडेकर, म. अ. मेहेंदळे यांनी या कामाबद्दल गौरवाचे उद्गार काढले आहेत. या विषयाचे पाश्चिमात्य अभ्यासक प्रोफेसर लुडविग स्टर्नबाख तसेच फ्रेंच पंडित लुई रेनॉ यांनीही वाई येथे चाललेल्या या कामाबाबत प्रशंसोद्गार काढले आहेत. ‘‘वाईसारख्या छोट्या गावात विद्यापीठीय संस्कृतीपासून दूर असणाऱ्या, खाजगी देणग्यांवर चालणाऱ्या, अशा या संस्थेचा आत्तापर्यंतचा प्रवास आश्चर्यजनक आणि कौतुकास्पद आहे’’ अशी प्रशस्ती त्यांनी दिली आहे.